Novas

O XACOBEO GALICIA NO CAMIÑO PORTUGUÉS

O Centro Galego-Xuventude de Galicia en Lisboa marcou o quilómetro cero dunha etapa con moitos quilómetros e estradas alagadas

[ 09/03/2010 ] O Centro Galego de Lisboa marcou o particular quilómetro cero do equipo Xacobeo Galicia no seu percorrido polo Camiño Portugués desde Lisboa ata Santiago de Compostela. Aos ciclistas acabou dándolles a noite no camiño, nesta maratoniana xornada que levou ao equipo ciclista profesional galego a facer noite en Curia.

Fotos da primeira etapa

A expedición saíra tarde de Lisboa en correspondencia aos actos protocolarios previstos, e polo camiño foise acumulando máis atraso, debido ao tráfico denso á saída de Lisboa e en particular nos cincuenta primeiros quilómetros.

Cando as vías parecían empezar a desconxestionares e as beiravías a facerse máis amplas, xurdiu un novo imprevisto: estradas alagadas de auga do río Tajo que baixaba crecido logo das copiosas choivas caídas o día anterior. Nalgún caso houbo que dar algún rodeo e noutros evitounos a colaboración do corpo de bombeiros voluntarios dalgunha cámara municipal, como foi o caso da de Pernes.

Tras un destes incidentes foi cando se acendeu realmente a mecha da competitividade no grupo, que rodou en todo momento a bo ritmo. Algúns ciclistas subíronse aos coches para pasar ese tramo duns dous quilómetros nos que a estrada aparecía cuberta de auga, e os seus compañeiros vingáronse cando volveron subir á bicicleta. Non lles deron tempo a baixar a bicicleta do coche. Arrincaron sen esperar e estableceuse unha longa persecución nunha das zonas máis despexadas do percorrido.

O día radiante, con temperaturas de dez graos na saída, que se elevarían ata os dezaseis en fases do camiño, axudou a gozar nunha ruta ciclista altamente atractiva, aínda que pouco acondicionada hoxe en día para o ciclismo ou cicloturismo de estrada, que é o que máis se presta polas características do terreo nesta ampla zona do centro de Portugal.

Se o Camiño de Francés parece moi adecuado para a bicicleta de montaña e o percorrido a pé, estoutro, por territorio portugués, axústase moi ben á bicicleta de estrada. Iso si, polo menos nestes momentos, non se aconsella programar etapas de máis de cento cincuenta quilómetros, porque a escasa sinalización, unhas veces, e o tráfico, noutras, acaban establecendo medias moi baixas. E, de ser posible, na actualidade, a saída de Lisboa había que programala para un domingo, coa fin de esquivar o denso tráfico das xornadas laborais.

Unha ruta cicloturista e a pé entre Lisboa e Santiago, ben delimitada, constituiría un reclamou turístico para amantes da bicicleta e peregrinos moi considerable. Na segunda etapa os ciclistas do Xacobeo Galicia irán desde Curia a Ponte de Lima sobre 184 quilómetros. Nestes momentos, a dificultade maior parece ser cruzar a cidade do Porto.

Invitación aos ciclistas amateurs dos equipos galegos
Cabe recordar que os ciclistas amateurs galegos foron invitados para facer o xoves a última etapa cos integrantes do Xacobeo Galicia desde o cruzamento da fronteira por Goian (O Rosal) ata Santiago, cun percorrido de 154 quilómetros. Cando os corredores amateurs se incorporen, os profesionais levarán trinta e dous máis, os que separan Ponte de Lima da fronteira por Vilanova de Cerveira, onde chegarán sobre as dez da mañá, hora española.